Karta de kanpunes

Cultura

Txuba!

Dja nu bebi rekadu ki bu manda-nu
Ku rafega di bentu ki pasa gosi li
I nos tudu nu fika ku surizu ratxadu…
So di sabi ma bu sta na mara troxa
Pa bu kunsa ben sen dia di bai

Nu kre fla-bu tanbe pa bu ben diskansadu
Pamodi nu sta ku kurason abertu ta spera-bu
Vizinhus dja ka marka simentera
Omis dja ka nkunha inxada
Ki dja duraba prindadu na kumera di kasa
I mudjeris dja ka poi simenti na vental
Es teni pe ku gana di ntudja koba.

Ben faxi fla-nu mantenha
Pamodi nu sta li xintadu lapu
Uns ku mo pregadu na kexada ta matuta
Otus ku brusu abertu ta spera bu abrasu solopadu.

Txuba amigu!
Nu sa ta pidi-bu so pa bu ka fase-nu
Sima anu di riba ki bu arma so arma i bu ka ben
I tudu nasenti seka seku toradu
I limaria fika ta bebi bentu
I ta kumi pedra pa ka mori ku bariga intxadu.

Ai, txuba amigu!
Tanbe ka bu ben so ku faronpa
I nen ku dizaforu
Pa bu ka foga kasa di fidju parida ku bu furia

Anda faxi, ben fla-nu mantenha
Ku agu ki ta disprinda di bu rostu
Ti ki bisti tudu nos rubera di speransa
Sima nomi di nos tera, Kau Berdi!